時間過得好快, 咁又成3個月無上過黎寫野... 嗯, 對寫日記之類的野, 我的確無乜耐性同恆心... XD
係呢幾個月, 我去左1次台灣, 今次去左想去好耐的清境, 結果, 除左個日出之外, 其他的... 都幾失望, 無計, 蝗蟲所到之處, 仲邊有好野未破壞得架? 唉...
呢幾個月, 我仲迷上左一套台劇 (喂~ 又黎?!), 係, 4, 5 年無煲台劇了, 今次又再煲返, "16個夏天", 初初只係因為套劇講返 1999 年台灣大學生的生活, 覺得好有共鳴, 令我想返起好多野, 但都後來... 當然就係又再一次迷上套劇的劇情啦...
但不經不覺, 呢套劇, 就剩返大結局未做咋... 有 D 唔捨得添... (個人成日形住唔會係 HAPPY ENDING 囉)
講起呢套劇, 有一個幾經典的密碼: vg5 fouo uooa ant.
就係: 我喜歡你. 的意思...
中意睇台劇的原因, 係因為劇入面都會搵到自己中意, 對方又中意自己的... 至於現實的我, 而家呢刻, 仲未遇到兩方情悅的人, 只係有對佢有好感的人, 但, 不管 "vg5 fouo uooa ant." 定係 "我喜歡你.", 我都講唔出口...
其中一個原因, 係過去, 我的告白失敗過 (仲唔只一次). 對而家的我黎講, 真係寧願保持現狀, 都唔敢再嘗試...
所以, 9月去台灣的時候, 我只係面書刻意話比全世界知: 我黎台灣玩喇, 但就去到台灣之後, 一直無同呢個人聯絡. 我想, 我係有少少故意咁做: 睇下佢會唔會知道我係台灣而主動搵我...
當然, 結局, 可想而知... 除左我生日嗰日有傳 line 祝我生日快樂之外... 無... 咩都無... (只係事後, 有人馬後砲話我一直留係清境山上, 所以無搵喎...)
其實, 早係出發之前, 已隱約知道, 佢已經有對象了, 只係應該處於曖昧的關係而未開始 (遲早的事), 既然係咁, 又何必再去打攪人地? 又何必令自己再增多少少 "唔開心", "失落" 等等的感覺?
時間會係最好的治療藥, 我知道的, 對佢的感覺會慢慢收返黎... 我知道, 我可以的...
